En gruppe børn fra NAKUUSAs første børnepanel hopper

Nunatta kangiani Meeqqat
Isummersorfiat siullerpaaq pilersinneqarpoq

Qaammatit kingulliit nunatta kangianit meeqqat 48-t NAKUUSAp Meeqqat Isummersorfianut ilaasortanngorusullutik qinnuteqarsimapput. Maanna qinnuteqartunit 11-illit ilaasortanngortut katerisimaartinneqalerput saniatigullu piffimmi ataqatigiissaarisussaannik aamma toqqaasoqarluni.

Qaammatit kingulliit ingerlaneranni nunatta kangianiit meeqqat 13-iniik 18-it tungaanut ukiullit NAKUUSAp nunatta kangiani Meeqqat Isummersorfittaassaanut qinnuteqarsinnaanikuupput. Qinnuteqarsimasut 48-pput taakkunanilu 11-it maanna siullerpaamik Tasiilami ataqatigiissaarisussartik peqatigalugu ataatsimoortinneqalerput.

”Nuannaarutigisorujussuuarput taamak amerlatigisut soqutiginnillutik ilaasortanngorusullutik qinnuteqarsimammata. Suliap ingerlarnga pissanganartorujussuusimavoq, maannalu ilaasortanngortuutivut 11-t nukittullutillu piginnaasamikkut siammasittorujussuupput, siunissamilu suleqatigisalernissaat qilanaarisorujussuullutigu”, Najaaraq Møller NAKUUSAmi suliamik aqutsisoq taamak oqaaseqarpoq.

Aningaasat UNICEF-imeersut periarfissiisuupput, tassani NAKUUSA UNICEF peqatigalugu Tasiilami sapaatip akunnera meeqqat pisinnaatitaaffii aallaavigalugit assigiinngitsorpassuarnik susassaqartitsineq ingerlanneqarsinnaanngortillugu. Meeqqat Isummersorfiannik pilersitsinerup saniatigut sisamanngornermi tallimanngornermilu Tasiilami nunaqarfinnilu ilinniartitsisunik pikkorissaaneq ingerlanneqassaaq.

”Meeqqat pisinnaatitaaffii qulakkeernerujumallugit meeqqat eqqaanniittut inersimasut meeqqat pillugit isumaqatigiissummik taassumallu imarisaaniittut immikkoortortanik paasititisinissaq pingaaruteqarnersat ilagivaat. Suna pineqarnersoq taakkulu ulluinnarni qanoq atornissaat ilisimassagaat. Taamaattumik uatsinnut pingaarluinnarpoq ilinniartitsisunik pikkorissaanissarput, taamaalillutik atuarfinni Nakuusaaqqat ikorfartorsinnaaniassammatigik, taakkulu saniatigut Meeqqat Isummersorfiat”, Sara Olsvig, Kalaallit Nunaanni UNICEF-imi suliniutinut pisortaq taamak oqarpoq.

Tasiilap eqqaaniittunit nunaqarfinnit tamanit pikkorissaanermi peqataasoqassaaq, taakkulu aamma saniatigut Meeqqat Isummersorfittaavata ataqatigiissarisussaa pikkorissaqataassalluni.

Pingasunngornermi Augustip 28-iani nal. 18.30 NAKUUSA UNICEFilu Tasiilami innuttaasunik tamanut ammasumut qaaqqusipput, tassani Meeqqat Isummersorfittaavat naapinneqarsinnaassaaq, tassanilu Tasiilami timersoqatigiiffiit NAKUUSAkkut UNICEFikkullu assigalugit nerriveeraqarrattussaallutik, peqqinnermik inooriaaseqarnissamut isumassarsiorfittut naapinneqarsinnaajumaarlutik.

Meeqqat Isummersorfittaap ilisaritinnerata kingorna naggasiutigineqassaaq Meeqqat Isummersorfittaap illoqarfimmi inussuliortinneqarneratigut, inussuk Meeqqat Isummersorfeqarneranik eqqaassutissatut illoqarfimmi ilisarnaataajumaarmat.

2018-imi Gentofte UNICEFip illoqarfigivaa, taamaalilluni aningaasanik katersaqarnermik kingorna aningaasat UNICEF Danmarkimut tunniunneqarsimallutik. Aningaasat taakku ilaatigut NAKUUSAp Tasiilami suliniutaannut tapertatut atugassatut tunniunneqarlutik.

NAKUUSA tassaavoq Namminersorlutik Oqartussat UNICEF Danmarkillu suliniutigisaat.

Støt UNICEFs arbejde i Grønland

Støt nu