Sara Olsvig

UNICEF Danmarkimi Kalaallit Nunaanni suliniutinut pisortanngussaaq Nuummi nutaamik qitiusumik allaffeqarluni

Hjem » Sara Olsvig UNICEF Danmarkimi Kalaallit Nunaanni suliniutinut pisortanngussaaq Nuummi nutaamik qitiusumik allaffeqarluni

Skrevet 19. februar 2019 af Emilie Rask Jensen

Sara Olsvig UNICEF Danmarkimi Kalaallit Nunaanni suliniutinut pisortanngussaaq Nuummi nutaamik qitiusumik allaffeqarluni

Sara Olsvig Kalaallit Nunaanni nalunngilluarneqareerpoq Danmarkimilu politikerit akornanni ilisarisimaneqarluarluni. 2011-mit 2015-mut Folketingimi ilaasortaavoq, 2014-miillu 2018-mut Inuit Ataqatigiinnut siulittaasuulluni. Siorna novembarimi siulittaasutut inatsisartunilu ilaasortatut tunuarniarluni aalajangiuppaa, maannakkullu UNICEF Danmarkip Kalaallit Nunaanni suliniuinut pisortaatut atorfinissalluni akuersisimavoq.

”Suliassaq pingaaruteqartoq akisussaaffigilissallugu tulluusimaarutigaara. UNICEF nunarsuarmi meeqqanut suliniaqatigiiffiit annersaraat ukiunilu qulinngulersuni Kalaallit Nunaanni meeqqat pisinnaatitaaffii pillugit suliniuteqaqataasimalluni.” Sara Olsvig oqarpoq.
UNICEF Danmarkimi generalsekretæri Steen Andersen, Sara Olsvigimik tikilluaqqusinissaminut qilanaarpoq.

”Assorsuaq nuannaarutigaarput Sara Kalaallit Nunaanni UNICEF-mi suliniutinut pisortatut sulerusunnersoq aperigatsigu akuersaarmat, taamatullu aamma Nakuusap ulluinnarni sulinerani sinniisorileratsigu”, generalsekretæri oqarpoq.

Meeqqat pisinnaatitaaffii pillugit UNICEF-p ingerlatai Sara Olsvigimut takornartaanngillat, siornatigut nunap inoqqaavinut inuillu pisinnaatitaaffiinut tunngasunik ilaatigut Inuit Issittormiut Siunnersuisoqatigiivini ICC-mi suliaqareernikuummat. Isumaginninnermut, Ilaqutariinnut, Naligiissitaanermut Inatsisinillu Atuutsitsinermut Naalakkersuisuusimanermigut Kalaallit Nunaanni pissutsinut ilisimasaqarluareerpoq soorluttaaq Nakuusap suliaanut ilisimasaqarluareerluni.

”Politikkikkut misilittagaqarluarnera Kalaallit Nunaanniillu ilisimasaqarluarnera aammalu Kalaallit Nunaanni ineriartornermik pimoorussilluni kivitseqataanera pissutaallutik Sara uatsinnut, Nakuusamut Kalaallillu Nunaanni meeqqanut sullitatsinnut assorsuaq iluaqutaassaaq,” Steen Andersen oqarpoq.

”Nakuusaqalersimanerata kingunerisaanik ukiut arfineq-pingasut matuma siornamut sanilliussigaanni meeqqat marloriaataannik amerlanerusut Kalaallit Nunaanni ullumikkut meeqqat pisinnaatitaaffiinik ilisimasaqarnerulersimapput, qujanartumik. Danmarkimut sanilliukkaanni kisitsisit amerlanerujussuupput. Namminersorlutik Oqartussanik qanimut suleqateqarsimavugut kalaallit meerartaasa pitsaanerusunik atugaqalernissaat anguniarlugu. Nakuusa pillugu suleqateqarnerput ingerlatiinnarniarparput, aammali UNICEF-p nammineq aallartisagaanik sulianik ingerlataqalerusuppugut”, Steen Andersen naggasiivoq.

 

UNICEF Nuummi allaffittaalerpoq

Sara Olsvigimik atorfinitsitsineq ilutigalugu UNICEF Danmark Nuummi nutaamik allaffittaassaaq, taamaalillunilu suliniaqatigiiffik ulluinnarni ersarinnerusumik sinniisoqalissalluni.

”Nunarsuaq tamakkerlugu malunniuteqaqisumik suliuteqarnerup kingunerisaanik Kalaallit Nunaanni allaffeqalernikkut UNICEF-p meeqqat pisinnaatitaaffii pillugit ilisimasarpassui maanga anngutissavagut taamaalillutalu maani iliuusissat annertusarlugillu najukkamut naleqqussarneqassapput. Sulilernissara qilanaareqaara,” Sara Olsvig oqarpoq.

Upernaap ingerlanerani UNICEF Kalaallit Nunaani allaffittaavanut ilinniartumik ikiortissarsiortoqassaaq.